نهنگیں درد منءَ پیچاں درداں من پیچاں
کہ اِے نه سِندءُ نه کُٹوکیں ٹَیلءِ پالیچاں

*مَیاراِنت لُنجیں زرانی مُرادءِ مُرواردی...
چتور اوستءُ اُمیتانی پَتَرءَ پیچاں

*بہ سبزاِیت بلکیں چَہ هاراں منی ، کِشارتَئی
گَهے نِهنگءُ گَهے کاجوءُ گَهے کیچاں

پدءَ پہ سلتگ ءَ دلبرینں درد اومان‌اَنت
که شادهانی سْرمین شهدءُ شکّلاں ریچاں

*بَرے پَہ هانُلءَ گُلکارین گال پِربندان
برے پہ راجءَ چَکَن کارین دَردان دَرّیچاں

چہ بَهبَهانی گُلیں تْراناں کدّهی کَیلاں ،
چہ دردءُ دوراں چو كرماني تاسءَ سَرّيچاں

*نہ كنت مَرگءِ شليں هَور تْرونگينت منءَ
کہ زِندءِ کُورمءِ آسءِ كريچءُ اگريچاں

مَه آزَگين‌اَنت گُلءِ آسكي گْريهـ ءُ گيوارءَ
دُناں زروكءُ زَباديں گوں ديدگاں گيچاں

اے زند ، شيرجتن اندوهاں كُرّ مِچ كُرتگ
پَہ مَستيں مَرگےءِ وَشّاتكءَ سْياهمارميچاں

سَيَد! نَه كَنت منءَ كوهيں مَرگ دْرشت نہ كنت
كه واهگءِ گُليں زوراكياں چَہ گُدوگيچاں

سید هاشمی /7/ جولاي /1969